Marcelo aachana na Fluminense

Beki wa zamani wa Brazil na Real Madrid, Marcelo ameihama klabu ya Fluminense ya Serie A ya Brazil kwa makubaliano.

Ingawa klabu hiyo ilithibitisha kuondoka kwa mchezaji huyo mwenye umri wa miaka 36 siku ya Jumamosi, haikuweka wazi ni kwa nini mkataba wake umekatishwa.

Marcelo alitofautiana na kocha Mano Menezes wakati wa sare ya 2-2 na Gremio Ijumaa kwenye uwanja wa Maracana mjini Rio de Janeiro.

Beki huyo wa pembeni, ambaye alishinda mataji 25 katika kipindi chake cha miaka 15 akiwa na miamba wa Uhispania Real, alikuwa karibu kuingia kama mchezaji wa akiba Menezes alipojibu jambo ambalo Marcelo alisema na kumwamuru arejeshwe benchi.

"Ningemweka Marcelo wakati huo, lakini nilisikia kitu ambacho sikukipenda, kwa hivyo nilibadilisha mawazo yangu," Menezes alisema katika mkutano na waandishi wa habari baada ya mechi, bila kutoa maelezo zaidi.

Marcelo alikuja kupitia safu ya vijana huko Fluminense na kucheza kwa muda mfupi katika kikosi cha kwanza kabla ya kuhamia Real mnamo Januari 2007.

Alijiunga tena na klabu yake ya utotoni Februari 2023 kufuatia muda mfupi akiwa na klabu ya Olympiakos ya Ugiriki mwaka wa 2022, na uwanja huo katika kituo cha mazoezi cha Fluminense ulibadilishwa jina na kuitwa Marcelo miezi miwili iliyopita.