Morgan kustaafu soka
Gwiji wa Marekani Alex Morgan anasema "amefanya sehemu yake" katika "kusaidia kupata heshima kwa mchezo wa wanawake" baada ya kustaafu soka.
Morgan, 35, ambaye alishinda Kombe mbili za Dunia za Wanawake na medali ya dhahabu ya Olimpiki, alithibitisha kustaafu kwake katika video iliyotumwa kwenye mtandao wa kijamii siku ya Alhamisi, ambapo pia alitangaza kuwa ana ujauzito wa mtoto wake wa pili.
Atacheza mechi yake ya mwisho ya kulipwa Jumapili wakati klabu yake ya San Diego Wave itakapochuana na North Carolina Courage kwenye ligi.
“Natumai urithi wangu ni kwamba nilisukuma mbele mchezo huo, nilisaidia kupata heshima kwa mchezo wa wanawake na kuongeza thamani na uwekezaji katika mchezo wa wanawake,” alisema Morgan.
"Nilitaka kusaidia wachezaji kama mimi kuheshimiwa, kuwa na rasilimali bora, kulindwa vyema, kuruhusu wachezaji wa kike kucheza soka tu na sio kuendelea kupigania mambo ambayo hatupaswi kupigania."
Mnamo 2022, Morgan alikuwa sehemu ya upande wa USA ambao ulipata makubaliano ya kihistoria ya malipo sawa baada ya wanachama wote wa kikosi kuwasilisha kesi mahakamani.
Akitafakari hilo, anasema liliunda "athari ya kipepeo" kwa ukuaji wa soka la wanawake duniani.
"Nikiangalia nyuma mwanzo wa taaluma yangu, ilipishana na magwiji na wachezaji wengi ambao walikuwa na athari kubwa kwa soka la wanawake kimataifa na ndani.
Hilo ndilo nililotaka," Morgan alisema. "Walizungumza juu ya kupitisha mwenge. Nilisaidia kubeba hilo kwa muda mrefu.
Nilihisi kama nilikuwa na jukumu la kupigania malipo sawa, kwa usawa, kufanya mambo tofauti katika mchezo ili kuinua na kulinda wachezaji.
"Ninahisi kama nimefanya jukumu langu. Kupigania malipo sawa katika timu ilikuwa wakati muhimu sana katika historia ya soka ya wanawake.