Koulibaly kutua Al Hilal
Kalidou Koulibaly amekuwa mchezaji wa hivi punde zaidi wa Chelsea kuhamia Saudi Arabia baada ya beki huyo kukamilisha uhamisho wa kwenda Al-Hilal kwa ada ambayo haijawekwa wazi.
Beki huyo wa kati, 32, anajiunga na Ruben Neves katika klabu hiyo ya Saudi Pro League kufuatia kiungo huyo wa Wolves aliyenunua kwa pauni milioni 47.
Kiungo wa kati wa Chelsea N'Golo Kante pia amekubali kusajiliwa na mabingwa wa Saudia Al-Ittihad, huku mwenzake Edouard Mendy akikaribia kujiunga na Al-Ahli.
Koulibaly alisajiliwa na Chelsea kutoka Napoli Julai mwaka jana kwa mkataba wa miaka minne.
Aliwasili Stamford Bridge akiwa na uzoefu wa Ulaya na kimataifa, baada ya kuisaidia Napoli kushinda Kombe la Italia mwaka 2020 na Senegal kutwaa Kombe la Mataifa ya Afrika mwaka 2022.
Lakini aliichezea klabu hiyo mechi 32 pekee katika mashindano yote, akifunga mabao mawili katika mechi 23 za Ligi Kuu ya Uingereza.
Chelsea haikufichua ni kiasi gani Al-Hilal wamelipa kwa Koulibaly - lakini ripoti zinaonyesha kuwa inaweza kuwa kiasi cha £20m.
Kuwasili kwa Koulibaly nchini Saudi Arabia kunafuatia mtindo wa hivi majuzi kutoka kwa vilabu vya Uropa ambao ulianza na Cristiano Ronaldo kubadili kutoka Manchester United kwenda Al-Nassr mnamo Januari.
Karim Benzema alifuata kutoka Real Madrid hadi Al-Ittihad mwishoni mwa msimu huu, huku Thomas Partey wa Arsenal na Bernardo Silva wa Manchester City wakihusishwa na kutaka kuhama wiki za hivi karibuni.
Mwenendo huo unadhihirisha azma ya ligi hiyo kuwa miongoni mwa tano bora duniani na inafuatia uamuzi wa mwezi Juni wa Mfuko wa Uwekezaji wa Umma wa Saudi Arabia (PIF), unaomiliki Newcastle United, kuchukua vilabu vinne vinavyoongoza nchini.